Ang Ikalawang Yugto

Taliwas sa Akala pero hindi Mali
...isang mahabang serye...

Nakilala ko ng mabuti ang kaibigan ng aking pinsan noong nakilala ko ang kras ko sa kolehiyo.

Ngunit itong kaibigan kong ito ay niligawan ko dahil naging kras ko din siya noong ako'y nasa hayskul pa lamang. Simple lamang ang kagandahan niya at tubo siya ng probinsya. Simple lang din ang kanyang mga gusto.

Ngunit ang aming mga usapan ay nadaan lamang sa patext-text, hindi ko man nililigawan ang aking kras sa kolehiyo ay naging mas matimbang naman siya sa aking puso sapagkat malapit lang siya sa akin, at araw-araw ko din siyang nakikita. Ngunit ang aking nililigawan ay talagang di ko rin maiwan, sapagkat naisip ko na kung ititigil ko ang aking panliligaw ay para na ring nakabawas iyon sa aking pagkalalake.

Dumating ang mga araw na kami'y nagkita, binigyan ko siya ng isang kwintas na may maliit na hugis puso. Kinantiyawan siya noon ng makita iyon ng aking pinsan, at ako'y natuwa, ito na nga siguro yung hinahanap ko na rason kung bakit ko siya nililigawan. Dumaan ang pasko at nasambit ko sa kanya na minamahal ko siya, ngunti tinanggihan niya iyon dahil hindi niya pa raw alam kung ano talaga ang nilalaman ng kanyang puso, nalaman ko na lamang na ako ay may kasabayan palang manligaw sa kanya, at sigurado akong mas matimbang ang nanliligaw na iyon kaysa sa akin sapagkat magkasama lang sila sa probinsya.

Napagisip isip na din ako sa mga kapanahunang iyon na ako'y nanliligaw lamang sapagkat hindi naman sa tamang rason, nililigawan ko siya sapagkat gusto ko lamang maranasan kung ano ang pakiramdam ng mayroong iniirog.

Ang aking pagtext ay hindi na kasing dalas ng dati, madalas na niya akong kulitin at ako'y naiirita, nasabi ko na sa kanya ng isang gabi kung ano ang aking nararamdaman at nauwi iyon sa kasunduan na maging magkaibigan lamang kami.

Ako'y nagbabad sa paglalaro ng mga video games at sa mga barkada ko, napansin ko din muli ang aking kras sa kolehiyo lalo siyang gumaganda at lalo pa akong naaakit, at siya ay single pa rin ata.

- TocinongPalaka

Taliwas sa Akala pero hindi Mali

...isang mahabang serye...

Namulat ang mata ko noong tumapak ako ng kolehiyo. Isa pa lang di kilalang mundo ang mundo ng kolehiyo sapagkat ako ay galing sa isang skwela na puro lalake (hindi pala puro, may mga binabae din pala) ang mga estudyante. Pero di ito patungkol dun, ito'y patungkol sa mga naranasan ko noong ako'y nasa kolehiyo na. Nakilala ko ang aking kras noong first year ng aking pagaaral sa kolehiyo. Di ko akalain na kras ko pala siya noong malaman ko na mayroon na pala siyang iniirog na iba. Nasaktan ako ngunit ako'y naging mabuting kaibigan sa kanya, patext-text sa gabi at umaga. Samahan sa paguwi dahil kasabay ko din naman siya. Ngunit dumating ang araw na napanaginipan ko siya isang gabi, at ako'y gulong gulo. Ako ay inlab na pala sa aking kras. Ngunit ito'y hindi maaari sapagkat mayroon pa din siyang ibang iniirog. Tinanong ko ang ilan sa mga kaibigan niyang babae patungkol sa aking problema. Tinulungan nila ako para masabi iyon sa kanya ngunit ito ay nauwi sa wala, sapagkat ako ay isang torpe. Pinagsisihan ko yun ng matagal hangga't sa nalaman ko na nagbreak na nga sila ng kanyang iniirog. Nilakasan ko ang aking loob at sinabi ang mga nilalaman ng puso ko. Ngunit hindi pala pwede, hindi pa daw siya handang sumabak sa dagat ng pag-ibig. Ayun sinambit niya na maging magkaibigan lamang muna kami, ngunit iyon ay dinamdam ko at napalayo na ako sa kanya. Sumubok ako maghanap ng iba at may nakilala akong isang kaibigan ng aking pinsan sa probinsya.

...itutuloy...

-TocinongPalaka